تأجيل الجيش للدراسة

ازاى تأجل جيشك فى مصر لسن ٢٩ سنه للدراسه بالتفاصيل
الموضوع ده من احد المواضيع اللى كانت نقطه تحول فى حياتى شخصيا طبعا مفيش حاجه فى الدنيا سهله وعلشان تنفذ الحوار ده محتاج مجهود , فى البوست ده هاقولك ايه شروط انك تاجل جيشك بسبب الدراسه ,
من ضمن القوانين الموجوده بين القوات المسلحه ووزاره التعليم العالى هيه البعثات العلميه وديه معناها انك ممكن تاجل جيشك علشان تكمل دراستك بعد الجامعيه (ماجستير ) فى بلد تانيه وده ممكن يبقى غريب لانك متعرفش تعمل كده لو انته بتعمل ماجستير فى مصر بس ده حقيقى لانى انا عملته, وكلمه البعثات العلميه مش معناها انك لازم واخد منحه مع ان دى حاجه لازم تسعى فيها بس حتى لو معكش منحه الموضوع متاح ليك برده , الفكره انك بيتاجلك جيشك لسن 29 سنه لو انته عندك الشروط ديه :
- معاك موافقه اى جامعه فى العالم انك هتكمل دراسه عندهم وعلشان تعمل كده لازم تكون مخطط للحوار قبل ما تتخرج بفتره لانك عشان تاخد موافقه جامعه ليها متطلبات ممكن ابقى اكلمكوا عنها بعدين ( حتى لو تقديرك مقبول فى جامعات بتقبل لحد
60 % ) وده موقع هتلاقى فيه معظم الفرص فى اوروبا
http://www.mastersportal.eu/
- الحاجه التانيه انك توثق الموافقه ديه من القنصليه بتاعت البلد اللى انته اتقبلت فى جامعه فيها عشان من الاخر انته لازم هتوثق الكلام ده من وزاره الخارجيه وده مش هينفع الا لو انته موثق ورقه القبول فى الجامعه من السفاره الاول ( الحوار ده اخره يومين )
- الحاجه التالته انك تطلع على مجمع التحرير الدور السابع لمكتب البعثات التعليميه تديلهم ورقه الموافقه بتاعت الجامعه موثقه من الخارجيه وبعد كده هتستنى لمده اسبوعيين علشان لازم تاخد موافقه امنيه الاول وديه لمجرد التاكد انك مش عليك قضايا او كده ( انصحك انك تروح المكتب ده لمجرد تشوف الدنيا ماشيه ازاى من دلوقتى )
- بعد ما تكون خدت الموافقه الامنيه هيدوك ورقه تطلع بيها على مركز الخدمات العسكريه اللى فى حلميه الزيتون وهناك نصف ساعه بالورقه ديه هياجلولك تجنيدك لحد سن 29 سنه او لحد ما تخلص الماجستير وترجع .
زى ما قولت اهم خطوه انك تجيب موافقه جامعه وديه حاجه مش صاعبه بس محتاجه مجهود وان شاء الله هبقى شير اللخطوات اللى انا عملتها بعدين . بس نصيحه لاى حد عايز يسافر , السفر مش سهل ولو ما عندكش هدف ( عارفه كويس ) و عايز توصله نسب الفشل فى السفر هتبق ليها حظ كبير علشان كده حدد هدفك من دلوقتى
واشتغل عليه .

‫#‏تابع_لمعلومات_اخرى‬
‫#‏الواقع_لازم_ينضف_فشخ‬